هل فعلاً قررت منصة يوتيوب إيقاف الربح من فيديوهات الذكاء الاصطناعي؟ ولا كل اللي بيتقال ده مجرد تهويل وشائعات؟ وهل في حاجة تانية بتحصل ورا الكواليس ومحدش واخد باله منها؟
النهاردة هقول لك على كل حاجة بالتفصيل، وهفهمك إزاي تشتغل صح وتكسب من غير ما قناتك تتعرض للخطر، أو للغلق، أو حتى لإيقاف الربح. وكمان هقول لك على سر صغير عن الذكاء الاصطناعي ممكن يغير طريقة شغلك كلها لو إنت بالفعل قررت تكمل في طريق اليوتيوب.
هل منعت يوتيوب استخدام الذكاء الاصطناعي حقًا؟
بص يا معلم، الإنترنت في الفترة الأخيرة قلب على خبر إن يوتيوب هتوقف الربح من أي قناة بتستخدم الذكاء الاصطناعي في صناعة الفيديوهات. ناس بدأت بالفعل تخاف، وناس بدأت تدور على طرق تلف وتتحايل بيها على خوارزميات يوتيوب (كالعادة يعني)، وناس تانية يأست وقفلت قنواتها قبل ما تفهم إيه الحكاية وقالوا: "هي مش جايبة همها، نقفل القنوات وخلاص!".
الحقيقة بقى إن الموضوع مش بالسهولة دي، واليوتيوب ما طلعتش قالت بصراحة "إحنا هنمنع أي حد يستخدم الذكاء الاصطناعي". القصة كلها إنهم شددوا على قوانين قديمة كانت موجودة بالفعل من زمان في نظام اليوتيوب، وهي:
- سياسة المحتوى الأصلي.
- سياسة المحتوى المكرر.
طيب ليه القصة دي موجودة من الأساس؟ اليوتيوب يا صديقي طول عمرها منصة للبشر. وللمفارقة العجيبة إننا بقينا بنقول الكلمة دي كتير قوي الفترة الأخيرة عشان نميز نفسنا، وكأن سبحان الله في كائنات عاقلة تانية عايشة معانا! الذكاء الاصطناعي وصلنا لمرحلة خلتنا نأكد إننا كبشر مختلفين عن الروبوتات.
لماذا ترفض يوتيوب الفيديوهات الآلية بالكامل؟
اليوتيوب مش للروبوتات، اليوتيوب معمول للبشر. إنت لما بتعمل فيديو، مش بتعمله عشان روبوت يتفرج عليه، إنت بتعمله عشان بني آدم زيي وزيك يتفاعل معاه، يضحك، يتشارك الفيديو، ويعلق عليه لما يعجبه. الروبوت مستحيل يعمل كده، وعمره ما هيتأثر بفيديو عن الدراما، السفر، الطبخ، أو حتى المراجعات التقنية.
فكرة اليوتيوب كلها قايمة على التواصل البشري؛ على شخصيتك، أسلوبك، وحتى أخطائك العفوية. أحياناً الموقف العفوي بيكون هو أحسن ما في الفيديو وبيخلق حالة كوميدية، لكن الذكاء الاصطناعي لو شاف الخطأ ده هيعتبره عيب غير مبرر ومش هيفهمه بمشاعرنا البشرية. ده بالظبط اللي بيخلي أي قناة تنجح.
المشكلة ليست في الذكاء الاصطناعي، بل في طريقة استخدامه
المشكلة الحقيقية بتظهر لما تعتمد على الذكاء الاصطناعي بنسبة 100%. في ناس حرفياً بتعمل الآتي:
- تكتب السكريبت بالذكاء الاصطناعي.
- تحول النص لصوت عبر أدوات زي (ElevenLabs) وغيرها.
- تصنع الصور والفيديوهات بالكامل ببرامج التوليد الآلي.
يعني الفيديو من أول ثانية لآخر ثانية مفيهوش أي لمسة بشرية. بالنسبة لليوتيوب، ده يُعتبر "محتوى آلي ومكرر" مفيهوش بصمتك أو شخصيتك.
ببساطة، لو يوتيوب عايزة تعمل محتوى من النوع ده، مش هتيجي تشاركك أرباح الإعلانات! هي تمتلك بالفعل أدوات وشركات ضخمة زي (Gemini) وتقدر تنتج كميات مهولة من الفيديوهات وتضخها في المنصة، لكنها مش عايزة كده، هي عايزة البشر هم اللي يبدعوا.
الطريقة الصحيحة لاستخدام الذكاء الاصطناعي في قنوات اليوتيوب
طيب إيه النصايح اللي نعملها لو حابب أكمل في صناعة المحتوى، مش حابب أظهر بوشي، وفي نفس الوقت عايز أستخدم الذكاء الاصطناعي بأمان؟
لازم تفهم إن اليوتيوب مش ضد استخدامك للذكاء الاصطناعي، بالعكس هي بتشجعك تواكب العصر، بس الفكرة إنك متخليش الآلة تعمل كل حاجة لوحدها. إليك أفضل الطرق لدمجه في عملك:
- كتابة وتحسين السكريبت: استخدم أدوات زي (ChatGPT، DeepSeek، Gemini، Grok) عشان تكتب أو تحسن السكريبت. أنا شخصياً بستخدمه عشان يظبطلي الكلام، بس وقت التسجيل برتجل عشان أضيف مشاعري وأوصّل المعنى بأسلوبي البسيط وحركة إيدي.
- التعليق الصوتي المدمج: بلاش تستخدم تعليق صوتي آلي 100% في كل الفيديوهات. يوتيوب وجوجل بيقدروا يكتشفوا ده بسهولة. لو في جزء صعب شرحه، ممكن تستعين بصوت ذكاء اصطناعي لمقطع صغير داخل الفيديو، لكن الأساس لازم يكون بصوتك إنت.
- المشاهد التوضيحية (B-roll): تقدر تصنع مشاهد فيديوهات بالذكاء الاصطناعي وتدمجها جوه الفيديو بتاعك كعامل مساعد لتوضيح الفكرة.
- الصور المصغرة (Thumbnails): دي من أفضل الاستخدامات. أنا في قناة "ديمو تك" وقناتي الجديدة، بقيت أعتمد بشكل كبير على توليد الصور المصغرة بالذكاء الاصطناعي (زي Midjourney أو غيره)، وبستخدم الفوتوشوب بس للكتابة عليها. الذكاء الاصطناعي بيطلع صور خيالية وأفضل من اللي موجودة على النت.
اليوتيوب بتقولك: "استخدم الذكاء الاصطناعي عشان يساعدك، مش عشان يحل مكانك".
الفرق بين استخدام الذكاء الاصطناعي في اليوتيوب والمقالات
في ناس هتقول لي: أنا بكتب مقالات بالذكاء الاصطناعي وجوجل بتقبلها ومفيش مشاكل!".
كلامك صح. لو عندك موقع وكتبت مقالات بـ ChatGPT، جوجل مش هتدقق أوي، لأن المقال في النهاية هو "نص مكتوب"، المهم إن المعلومة توصل للقارئ بأفضل شكل ممكن.
لكن الفيديو حاجة تانية خالص. الفيديو بيحمل صوتك، شكلك، طريقتك، ونبرة كلامك، وده اللي بيخلي الفيديو أقوى مليون مرة من النص المكتوب. أي نقص في "الروح البشرية" جوه الفيديو بيبان جداً للمشاهد. أنا جربت أعمل مشهد كامل بالذكاء الاصطناعي، النتيجة كشكل كانت حلوة، لكن حسيت إنه "بارد" ومفيهوش الروح والتعبير، ولما ضفت صوتي وطريقتي في المونتاج، النتيجة بقت أحسن بكتير.
الخلاصة
الذكاء الاصطناعي مش عدوك، هو أداة قوية جداً لو عرفت تستخدمها صح. خلي الـ AI يساعدك، بس إنت اللي لازم تعمل الشغل الأساسي. لو الفيديو بتاعك معمول كله بشكل آلي، إنت بتخسر أهم حاجة وهي شخصيتك، وبدون شخصيتك المشاهد مش هيكمل معاك حتى لو يوتيوب وافقت على ربحك، لأن المشاهد بيتعلق بصانع المحتوى أكتر من المحتوى نفسه.
أتمنى تكون الفكرة والرسالة وصلتلك. لو عندك أي سؤال بخصوص اليوتيوب أو حابب إني أعمل فيديو عن موضوع معين، سيب رأيك وطلبك تحت في التعليقات، وإن شاء الله هرد عليك. أشوفكم على خير في موضوع جديد، ومع السلامة!